Maiatzeko hauteskundeen ostean, Nafarroako panorama politikoa nahasi samar geratu da. Batzuek eta besteek asko dute esateko eta horregatik, iritzi eta ikuspuntu ezberdinen bila abiatu nintzen atzoko saioan. Hori bai, politikarien gertuagoko irudi bat bilatu nahi izan nuen eta politikariak eroso eta gustura sentitzen diren ekintzetan harrapatu nituen.

Begoña Errazti Eusko Alkartasuneko presidentearekin Bilboko Arte Ederretako Museoa bisitatu nuen. Arte lanen artean galduta ibili nintzen baina gustora hala ere! Erraztiren laguntzarekin, Oteiza, Zumeta eta beste hainbat artisten lanak ulertzen saiatu nintzen... saiatu behintzat bai!

Nafarroa Bai koalizioko Patxi Zabaletarekin, ordea, mendian bueltatxo bat egitera atera nintzen. Leitzako zelaietatik perretxikotan joan ginen biak. Uztailean perretxiko bila; niri baino ezin zitzaidan halakorik bururatu!

Eta Leitzan bertan, musean jokatu nuen UPNko Pello Urquiolarekin. Enbido eta hordago artean Urquiolaren "Nire hitza bertsotan" liburuaren inguruan mintzatu genuen. Eta partidatxoaren ondoren bertsotan aritu ginen. Guardia Zibilaren aldeko bertso eta guzti!