Aurtengo denboraldia oso txarra izan da euskal futbol taldeentzat. Realak eta Athleticek bereziki asko sufritu dute, baita Alavesek ere. Ugariak izan dira zaleek eman dituzten arrazoi eta teoriak, eta atzo guztiak bildu genituen gure programan.

Athleticen entrenamenduan egon nintzen, Lezaman, eta zurigorrien jokaera salatu nuen, batzuen iritziz modu gogorrean. Nire ustez, jokalariek ez dute guztia ematen zelai gainean; mahai-futbolean jokatzeko ere ez dira gai eta!. Hori egiaztatzeko futbolin partida jokatu nuen Tiko, Zubiaurre eta Luis Prieto lehoiekin. Derbya jokatu genuen, Athletic Realaren kontra, eta Zubiaurrek nirekin jokatu zuen! Realarekin, jakina!

Athleticeko mutilak gaizki aritu dira, baina neskak, urtero lez, ligako txapeldun izan dira. Hala ere, beste behin ere, gabarrarik ez emakumeentzat. Nire traineruan eraman beharko ditut azkenean!

Reala, berriz, bigarren mailara jaitsi da. Nik ezin izan dut ezer egin, baina saiatu behintzat, saiatu naiz. Miguel Angel Lotinarekin izan nintzen eta galdera argia egin nion: nor da Realaren egoeraren erantzulea? Nire ustez, pertsona ugari...

Jesus Aranbarri talde txuri urdineko aurrelari izan zen eta bere golari esker, duela 40 urte, lehen mailara igo zuen talde donostiarra. Lau hamarkada geroago, Realaren jaitsieraren lekuko izan zen nirekin batera.

Bigarren mailan, Alaves izan dugu aurten euskal ordezkari bakarra. Ez da oso fin aritu eta gasteiztarrek argi eduki dute errudunaren izena: Dimitry Piterman. Gehiengoa presidentearen kontra azaldu da, baina bada Piterman sutsuki defendatu duen norbait: ni neu! Dimitryrekin batera izan nintzen palkoan.

 

Ikusi al zenuten programa? Eman iritzia eta komentatu!