Harri handien Euskadiko txapelketa burutu da asteburuan. Aimar Irigoienek lortu du txapela (zorionak!!), eta nola gainera. Errezildarrak egindako lana aztertzeko modukoa da, hiru errekor hobetu zituen: orotara 9.475 kilo (aurreko marka baino 525 kilo gehiago), 175 zilindrikoa 17 aldiz altxatu zuen, eta 150 kiloko kubikoa 16 aldiz.

21 urte ditu, bigarren aldiz jarraian irabazi du harri handien txapela, denboraldi honetan bertan harri txikien txapelketa irabazi du. Beraz, harri handiekin zein txikiekin onena izan da.

Irigoienen lana aparta da, jada maila bikaina lortuta dago, eta etorkizuna ere oparoa dauka. Hala ere, dena ez diot ona ikusten Irigoieni, huts bat ikusten diot, eta ez da bere errua: ez dauka aurkaririk. Kirolari batek, bere maila hobetzeko, erronkak behar ditu, besteak beste, aurkariak behar ditu, gehiago motibatzen delako, prestakuntzarako grina sortzen duelako, eta zaletuarentzat ere erakargarriagoa delako.

Beraz, Aimar Irigoienek jarrai dezala orain arte bezala, baina ea norbait gai den aurka egiteko: denok gehiago gozatuko dugu, eta akaso bera oraindik gehiago hobetzeko balioko du, ea horrela den!!


 (osorik irakurri)