Ze zaila den kirolari batentzat gailurrera iristea, munduko onenekin lehiatu eta horien artean lehen postua lortzea. Hori behin egitea zaila da, eta bitan egitea, zer esanik ez. Munduko kopa irabazi du Patxi Usobiagak, emozioz beterik bizi izan dugu asteburu guztian zehar azken txapelketa, Kranj-en, Eslobenian.

Hiru Erregeen Mahaian urtero antolatzen dugu urteko euskal kirolari onenaren aukeraketa, iaz Usobiagak irabazi zuen, eta aurten ere, noski, hautagaien artean egongo da eibartarra.

Sekretua? Galdetuko duzue akaso batzuk. Berez ona izatea, baina batez ere, eta hau edozein kirolariri entzungo diozue, lana. Lana da gailurrera eraman eta han mantentzen duena kirolaria. Ondo prestatzea, fisikoki, teknikoki, eta psikologikoki. Eta irabazteko griña izatea. Irabazi ez bazuen ere, bigarren geldituta ere, lana ona egin duela ez dago zalantzarik. Baina irabazi egin du, eta pozten gara. Munduko kopan txapeldun, munduko txapelketan bigarren, gozatu Patxi!!

Garaipena, neurri handi batean, Valencen irabazitako munduko kopako proban oinarritu du. Gozatu Usobiaga ikusten >>>

Eta azken hitzak Irati Andarentzat. Lehen aldiz munduko kopa osorik egiteari ekin, eta gasteiztarrak bost finaletan egotea lortu du, Kranj-en bigarren postua, eta sailkapen nagusian bostgarrena, zorionak zuri ere, Irati!!!