Beno, egia esan, asteburu guztien atarian esan daiteke hau, beti izaten dira kirol ekitaldi ugari.
Dagoena kontutan hartuz, egutegi baten modukoa egiten saiatuko naiz, denbora, gogoa (eta dirua) izanez gero, hurrengo egunetarako menua.
Ostiralean, Mundakara (edo Bakiora) joango ginateke gure kirol txango honetan. Goiza eta arratsaldea bertan igaroko dugu, beti ere olatuak baldin badaude. Munduko surflari onenekin gozatuz. Ondoren San Mameserako bidea hartuko dugu, Athletic-Milan partidua ikusteko. Europako txapelduna, Maldini, Ronaldo “potxolo galaktikoa” etab. ikusteko.
Larunbatean, goizez Gernikara, bertako rallia igarotzen den bide bazterrean jarri eta kotxeei begira gozatu. Bazkaldu ondoren, Ordizian rugbi derbia, Ordizia – Getxo.

Eta hau lehen platera soilik izango da, ondoren, rugbi giroa bero-bero bizi duen Ordizia bezalako herri batean, telebistaren bat dagoen toki bat aurkitu, eta munduko rugbi txapelketako lehen finalerdia ikusiko dugu. Hirugarren denborarena norbere aukeran!
Igandean, Doneztebera goizez, aizkolariak, Euskal Herriko finala. Arratsaldean Eibarko Astelena frontoira, lau t’erdiko txapelketako partidua ikustera. Iluntzean, gogoa duenak, munduko rugbi txapelketako bigarren finalerdia jarrai dezake.
Eta ez dago esan beharrik, gure kirol jardun honetan, egunero, Euskadi Irratia belarrian, Hiru Erregeen Mahaia entzunez, zuzenean ikusten ari ez garen beste kirol ekitaldi guztien berri jasotzeko. Animo!!