Kaixo guztioi!!!!

Oraingo honetan surfari buruz idatzi behar dut, baina surfa hurbiletik jarraitzen ez duzuenoi zuzenduko natzaizue bereziki. Noski, surfzaleak zaretenok ere irakurri dezakezue, baina uste dut ez duzuela ezer berririk aurkituko, zuek badakizue hemen jartzera noan guztia.

Munduko surf zirkuito nagusian, WCT izenekoan, munduko 44 surflari onenak aritzen dira. 10 txapelketek osatzen dute zirkuitoa, eta amaieran, irabaztea lortzen duena da munduko txapelduna. Txapelketa horiek Australian, Tahitin, Brasilen, Hego Afrikan, Hawaiien, edo Europan egiten dira. Soilik bi dira Europako txapelketak, Frantziako Landasetan, eta Mundakan. Gainera, zortzigarren txapelketa da Euskal Herrikoa, ondorioz, sailkapena pil-pilean dagoela iritsi ohi dira gure kostaldera, eta iaz bezala aurten ere, munduko txapelduna bertan erabaki daiteke.

Surfean garrantzitsuena olatu gainean ahalik eta gauzarik ederrenak egitea da, baina horretaz gain estrategiak, arerioaren markaketak, etab.ek ere balio handia izaten dute. Mundakako talaiatik denak zuzenean ikusteko aukera duzue. Lehen egin dudan galdera erantzunez beraz, surf zaletu ez zareten horiei esango dizuet: bai, merezi du joatea, Bat Formulako hurrengo lasterketa, Txapeldunen Ligako finala, edo 100 metroko munduko txapelketa zuzenean ikustea bezala da. Gainera, etxetik hurbil, euskal kostaldeak duen altxorrik ederrenetakoan, eta nori animatu izan dezazuen, kanpoko surflari horien guztien artean, etxeko bi, Hodei Collazo eta Aritz Aranburu.

Ze plan hoberik duzue hurrengo egunetarako?