Giro atsegina izango dugu gaur egun osoan, eta bihar ere, arratsaldera arte. Aldaketa igandean helduko da, fronte hotz batekin. Kontsultatu iragarpenak eta bidali eguraldiari buruzko argazkiak  EiTBra.

Eguna udaberri giroarekin eta zeru garbiekin hasi da Euskadiko hiriburuetan.

Ostirala
Gaurko, ostirala, Euskalmet Euskal Meteorologia Agentziak eguraldi atsegina iragarri du. Eguna laino-guneekin hasi da, baina laster joan dira, eguzkiari bidea emanda egun osorako.

Gainera, tenperaturak udakoak izango dira ostiral honetan, hegoaldeko haize pixka batekin, termometroak 24 edo 25 gradura arte igota. Kostaldean haize leuna joko du.

Larunbata
Bihar, larunbata, giro eguzkitsua izaten jarraituko dugu, joko duen hegoaldeko haizea dela eta tenperatura maximoak 25 gradutik gorakoak izango baitira.

Beroaren eraginez arratsalde partean hodeiak eratzen joango dira, eta baliteke ekaitzak botatzea, barnealdean batez ere.

Igandea
Iganderako, ordea, aldaketa iragarri dute, giroa hoztuko duen fronte hotz bat dela eta. Halaber, zerua estalita egongo da eta euria botako du. Arratsaldean ekaitzak ere bota ditzake.

Haizeak iparraldetik joko du, tenperatura maximoen jaitsiera nabarmena eraginda.

Kontsultatu iragarpenak eta bidali eguraldiaren inguruko argazkiak EiTBra.