Gaurko 100 km/h-ko ufadak izango dira baina bihar, asteartea, joko du gogorren: 120 km/h-ra ere helduko dira. Ondorioz, bost metroko olatuak izan daitezke. Kontsulta ezazu iragarpena.

Asteburuan bezala, datozen egunotan ere zakar joko du hego-mendebaldeko haizeak. 120 km/h abiada lor dezakeela eta, alerta ezarri du Eusko Jaurlaritzako Herrizaingo Sailak. SOS-Deiak/112 zerbitzuak hainbat larrialdi zerbitzu jakinaren gainean jarri ditu, beharrezko neurriak har ditzaten.

Gaur (astelehena), hego-mendebaldeko haize moderatua ibiliko da, eta baliteke haizeguneetan 100 km/h-ko abiadura eta haizeguneak ez diren lekuetan 80 km/h-koa hartzea. Bihar (asteartea), ufada indartsuagoak egongo dira, iragarpenen arabera, eta haizeguneetan 120 km/h-ra ere helduko dira.

Halaber, litekeena da bihar (asteartea) 3,5 metroko olatuak izatea, eta iluntzean 5 metrokoak ere izan litezke. 

Hori dela eta, SOS-Deiak/112 zerbitzuak hainbat larrialdi zerbitzu ohartarazi ditu, beharrezko neurriak har ditzaten.

Haize gogorra dagoela eta, gomendioak

Eusko Jaurlaritzako Larrialdiei Aurregiteko Zuzendaritzak gomendio hauek helarazi nahi dizkie herritarrei:

Itxi pertsianak, leihoak eta leiho-ateak, eta kendu loreontziak, esekitako gaiak, oholak eta haizeak eraman ditzakeen bestelako objektuak.

Erabili ibilgailuak kontu handiz eta saihestu kostaldeko bideak, zubiak eta haizeguneak. 

Ez erabili ontzirik eta zaindu zure amarrak. Ez egin inolaz ere ur kirolik.

Ez ibili zuhaitzen, eraikitze lanetan dauden eraikinen edo kostaldeko pasealekuen ingurutik.

Agintarien aholku eta aginduak bete.