Gogor joko du haizeak eguerdira arte. Ondoren, jaitsi egingo da tenperatura, euria egingo du eta elur-kota 800-1.000 metrora jaitsiko da. Bidali eta ikusi eguraldiari buruzko argazkiak EiTBra.

Haizea da eguneko lehen orduetako protagonista, ia 100 kilometro orduko abiaduran baitabil toki askotan. Eguna hegomendebaldeko haize indartsuarekin hasi da Euskal Herrian eta eragina antzematen ari dira bai kostaldean bai barrualdean ere. Dena dela, lasaitzen joango da eguerditik aurrera.

Gaur aldaketa eguna izango da. Iragarpen meteorologikoaren arabera, arratsaldean gogotik egingo du euria eta zaparradak ekaitz bihurtuko dira hainbat unetan. Tenperaturak ere nabarmen egingo du behera, 11-15 gradutan edo geratuz maximoak.

Arratsaldean, 1.000 metrora jaitsiko da elur-kota, oro har, baina hainbat lekutan 800 metrotara egingo du.

Asteburuan

Asteburuari begira, larunbata gaurkoaren oso antzekoa izango da: 800 metrotara elurra egingo du eta mendebaldeko haizeak indarrez joko du arratsaldera arte. Orduan indarra galduko du eta eguraldia hobera egiten hasiko da.

Hala, egoera lasaiagoa izango da igandean eta tenperaturak ere atseginagoak izango dira. 

Kontsultatu eguraldiaren iragarpena, meteorologiaren inguruko albiste guztiak dituen bloga, eta ikusi edo bidali eguraldiari buruzko  argazkiak EiTBra.