Foru Gobernuak dispositibo berezia jarriko du martxan, asteburuan zehar elurra botako duela iragarri baitute. Bidali eta ikusi eguraldiari buruzko  argazkiak EiTBra.

Nafar askok elurra ikusiko dute ostiral honetan. Izan ere, iragarpenaren arabera, elur-kota 700-800 metrotan izango da.

Hain justu, elur-prezipitazioen iragarpen horri jaramon eginda, Nafarroako Gobernuko Herri Lan Kontseilaritzak dispositibo berezia jarriko du martxan ostiral iluntzetik aurrera. Hala, elurra kentzeko makinak jarriko ditu arazo gehien izaten duten errepideetan.

Orotara, 56 makina erabiliko dira, 42 erabiltzeko prest izango dira ostiraleko 20:00etatik aurrera eta beste 14, larunbat goizetik (06:30) aurrera.

Honako herrietan izango dira elurra kentzeko makinak: Aoitz (5), Iruña (2), Tafalla (4), Tutela (1), Lizarra (4), Irurtzun (autobideetan, 14) eta Mugairi (4).

Larunbatean, makina gehiago jarriko dituzte, ondoko herrietan: Aoiz (beste 5), Iruña (2), Tafalla (1), Irurtzun (errepideetan, 3), Mugairi (3).

Iragarpena, egunez egun

Giro atsegina izango da gaur nagusi baina, egunaren amaieran, hego-mendebaldeko haizea indartu egingo da eta 100 km/h-ko haize-boladak izan ahalko dira haizeguneetan. 

Zeruan hodeiak eta ostarteak tartekatuko dira oro har, baina gaurkoan urdinguneak nabarmenduko dira. Hala ere, goizeko lehen orduetan barnealdean tarteka hodeitsu egongo da. Arratsalde amaieran, lainoak ugaritzen joango dira. Haizeak hego-mendebaldetik jotzen jarraituko du eta ilunabarretik aitzinera indartzen joango da. Tenperaturak epeletik jarraituko du, eta gaur gainera haizearen hego ukituari eguzkiaren presentzia gehituko diogu, eta ondorioz 14-15 ºC-ren inguruan ibiliko dira termometroak orokorrean, kostaldean pittin bat altuago. 

Ostiralean okerrera egingo du eguraldiak. Hodeiak nagusituko dira zeruan, eta eguerditik aurrera, estalia egongo da erabat. Euria botako du eta zaparradak mardulagoak izango dira eguerdi aldetik aurrera; egunaren amaieran baliteke trumoitsuak izatea. Bustitzeaz gain, arreta jarri beharko diogu haizeari, izan ere, egunaren lehenengo partean hego-mendebaldetik zakar joko baitu; orduek aurrera egin ahala, mendebaldera eta ondoren ipar-mendebaldera aldatuko da. Ipar-mendebaldeko haizea tarteko, elur-kota jaitsiko da, 1.000 m inguruan kokatuta egunaren amaieran. Nafarroan, 700-800 metrotan egongo da elur-maila. Egoera honen aurrean, giroa nabarmen freskatuko da. 

Asteburua fronte hotzaren hondarrekin hasiko da. Egunean zehar eguraldiak hobera egingo du. Hala ere, goizaldean euri apur bat espero da eta zaparrada trumoitsuak botatzeko arriskua izango da, bereziki Kantauri isurialdean. Arratsaldean atertzeko joera izango du eta hodeitza gutxiko da. Haizeak ipar-mendebaldetik joko du eta aldatzen joango da arratsaldean hego-mendebaldekoa izan arte. Haizeak indarra galduko du. Elur-maila 1000 metroan kokatuko da goizaldean, goizean zehar igoz. Tenperatura pixka bat jaitsiko da. 

Igandean, hobera egingo du eguraldiak eta tenperaturek gora egingo dute. Astelehenerako, ordea, euria eta hotza espero dira.  


Kontsultatu eguraldiaren  iragarpena, meteorologiaren inguruko albiste guztiak dituen bloga, eta ikusi edo bidali eguraldiari buruzko  argazkiak EiTBra.