Bost gradu azpiko tenperaturak espero dituztenez, neguko plan berezia prest du Babes Zibilak Ipar Euskal Herrian. Ikusi edo bidali eguraldiari buruzko  argazkiak EiTBra.

Aurreikuspenak betetzen badira, merkurioak behea joko du Iparraldean gaur. Hurrengo egunetan 1 eta 5 gradu azpiko tenperaturak espero dituzte Ipar Euskal Herrian eta, horregatik, Gurutze Gorriak eta Babes Zibilak Baionan eta Pauen dituzten ordezkaritzek neguko plana indartu dute.

Pirinio Atlantikoetako Prefekturak ohar baten bidez jakinarazi duenez, gaurko 18:30etatik ostiraleko 07:00ak arte izango da indarrean neguko plan berezia.

Euskalmeten iragarpena

Eguraldiaren  iragarpenaren arabera, goizeko behe lainoa eta gandua altxatu ondoren, hodei gutxiko zerua nahiz zeru garbia izango dugu Euskal Herrian.

Ekialdeko eta ipar-ekialdeko haizeak joko du eta tenperatura beherantz joango da: jaitsi egingo dira bai tenperatura minimoak baita maximoak ere.

Barrualdean izozte ahulak izango dira egunaren hasieran eta amaieran.

Ostegunean

Ostegunean ere behe lainoa izango da eguneko lehen orduetan. Ondorenean, zerua garbi eta eguzkitsu egongo da iluntzera arte.

Ekialdeko ukitua izango du haizeak eta tenperatura minimoak beherantz egingo badute ere maximoak pitin bat igoko dira.

Berriz ere izozteak izango dira eguneko lehen eta azken orduetan.

Ostiralean

Ostiralean ere lanbroarekin jaiki eta egun eguzkitsua izango dugu gero.

Iparraldeko haizeak joko du eta hotza egingo du.

Egunaren hasieran eta amaieran izotza izango da berriz ere protagonista.

Asteburuan

Asteburuan lainoteria gehiago sartuko da eta eguzkia nahiz lainoak tartekatuko dira bai larunbatean bai igandean ere.

Ipar haizea izango dugu eta tenperatura are beherago joango da.

Izozteak izango dira asteburuan ere.

Kontsultatu eguraldiaren iragarpena, meteorologiaren inguruko albiste guztiak dituen bloga, eta ikusi edo bidali eguraldiari buruzko  argazkiak EiTBra.