Gauean ez du euririk egingo Euskal Herrian, baina, aterruneak gutxi iraungo du, izan ere, biharko euria iragarri dute. Kontsultatu iragarpena eta bidali eguraldiari buruzko argazkiak EiTBra.

Maiatzeko azken asteburuak eguraldi ezegonkorrarekin esango digu agur. Azken orduetan euria izan da nagusi eta badirudi aurrerantzean ere antzeko giroa izango dugula Euskal Herrian.

Iragarpenak, ordea, iluntzetik aurrera eguraldiak hobera egingo duela dio, halere, bihar arratsaldean, gure artean, berriz euria izango omen dugu.

Igandea

Euskalmet Euskal Meteorologia Agentziak egindako iragarpenaren arabera, igandea ere euritsua izango da, nahiz eta lehen orduetan zeruak nahiko garbi azaldu.

Goizetik, ostarteak izango dira, baina, geroago hodeiak nagusituko dira eta arratsaldetik aurrera euria iritsiko da.

Eguraldi aldakorra, beraz, izan ere, gauean berriro atertuko du, batez ere, barnealdean.

Tenperatura minimoek behera egingo dute eta nahiko hotzak izango dira. Maximoak bere horretan mantenduko dira.

Astelehena eta asteartea

Astea ere eguraldi txarrarekin hasiko dugu. Dena dela, astelehenean euri arina izango da nagusi eta orokorrean asteburuan baino prezipitazio gutxiago izango dira.

Gainera, egunak aurrera egin ahala, atertu egingo du. Tenperaturak, aldiz, jaitsi egingo dira.

Asteartean, aurreko eguneko antzeko giroa izango dugu.