Eguraldi zakarra izango dugu Euskal Herrian asteburu osoan zehar, izan ere, fronte batek euria eta giro ezegonkorra utziko du datozen orduetan.

Maiatzak euri eta tenperatura freskoekin esango digu agur, iragarpenen arabera. Dirudienez, gaur arratsaldetik aurrera, aldaketa nabarmena izango du eguraldiak eta asteburuan giro zakarra edukiko dugu gure artean.

Gaur, ostirala, zeruak garbi egongo dira arratsaldera arte, baina, ordutik aurrera fronte batek euria eta tenperatura freskoak utziko ditu. Gainera, egunaren bigarren zatian, ekaitza ere izan daiteke hainbat tokitan.

Larunbata
Bihar, zeruak estalita egongo dira goizetik. Ekaitz arriskua ere mantenduko da eta haizeak gogor joko du ipar-ekialdetik.

Tenperaturei dagokienez, maximoek nahiz minimoek behera egingo dute nabarmen.

Igandea
Iganderako ez da aldaketarik espero. Larunbatean bezala, zeruak estalita egongo dira, batez ere arratsalde partean.

Euriak ez du etenik izango eta tenperatura minimoek behera egiten jarraituko dute. Maximoak, ordea, zertxobait igoko dira.

Kontsultatu eguraldiaren  iragarpena, meteorologiaren inguruko albiste guztiak dituen , eta ikusi edo bidali eguraldiari buruzko argazkiak EiTBra.