Aldaketa Klimatikorako Gobernuz arteko kideen txostenaren arabera, 2030ean egungo CO2 partikulen kopuruari eusteko, BPGaren %3 beharko da.

Aldaketa Klimatikoari buruzko Gobernuz arteko kideek Bangkoken argitara eman duen hirugarren txostenak dioenaren arabera, politikariek eta Gobernuek ahalegin handiagoa egin behar dute, enpresa eta gizabanakoei neurriak hartzera bultzatu eta horrela klima aldaketa saihestu ahal izateko.

Adituen esanetan, gaur egun, negutegi efektua eragiten duten gasen isuriak murrizteko beharrezkoa den jakinduria eta teknologia gure artean dugu. Horregatik, ahalegin handiagoa egin behar dela diote.

Ildo horretan, 2030erako gas isuriak 26.000 milioi tona gutxitu ahal direla eta horrekin iragarritako 2 eta 3 graduko berotzea saihestu daitekeela azaltzen du txosten honek. Horretarako, alegia, aldaketa klimatikoari aurre egiteko, 2050. urterako dioxido karbonoaren isuriak %50 eta %85 artean murriztu beharko lirateke.

Izan ere, 2030ean egungo CO2 partikulen kopuruari eusteko, BPGaren %3 beharko da. Isuriak %50 eta %85 artean gutxitzea lortuz gero, aldiz, %1era jaitsiko litzateke gastua. Lau egunez Bangkoken elkartuta egon dira nazioarteko adituak eta gaur argitaratu dute hirugarren txosten hau. 

Hainbat plan proposatu dituzte bertan, horien artean, energia nuklear gehiago erabiltzea, genetikoki eraldatutako bio-erregaiak ugaritzea eta CO2 gasak bildu eta harrapatzea.