Lainoak eta euria nagusituko dira eta eguzkia tarteka baino ez dugu ikusiko, gutxienez, ostegunera arte.

Asteburu osoan zehar giro nahasia izan dugu protagonista Euskal Herri osoan eta iragarpenen arabera, datozen egunetan ez da aldaketa handirik egongo. Lainoek eta euriak, beraz, gure artean jarraituko dute; eguzkia, ordea, tarteka baino ez dugu ikusiko.

Goizetik euria egingo du gaur Euskal Herriko txoko gehienetan. Arratsalde-iluntze aldera, berriz, baliteke ostarteak zabaldu eta euri gutxiago egitea.

Tenperaturak aurreko egunetan baino zertxobait baxuagoak izango dira eta minimoek aldaketarik izango ez badute ere, maximoek behera egingo dute.

Asteartea

Asteartean eguraldiak hobera egingo du. Egunaren lehen partean zeruak estalita egongo dira, baina, arratsaldetik aurrera euririk ez egitea eta eguzkia azaltzea espero da.

Asteazkena

Tenperaturak nabarmen igoko diren arren, asteazkenean ere euria nagusituko da Euskal Herrian, batez ere barnealdean.