Hodeitsu egongo dira zeruak eta, batez ere, astelehenean eta asteartean botako du euria. Tenperaturek pixka bat egingo dute gora.

Batzuek asteburu luzea izango dute baina, dirudienez, eguraldiak ez du treguarik emango eta nahasi ibiliko da asteartera arte. Euskalmet Euskal Meteorologia Agentziaren arabera, zeru grisak eta euria izango dira protagonista baina, batez ere astelehenean eta asteartean.

 

Gaur, ostirala eguraldi hobea izango dugu goizean, hodeien artean oskarbiguneak zabalduko dira Gipuzkoan, Bizkaiko kostaldean, Iparralden eta Nafarroa iparraldean. Gainerakoan zaparrada arin-ertainak botako ditu eta zerua ia estalita egongo da. Tenperatura maximoak 17-20 ºC ingururaino igoko dira. Arratsalde-gau partean, zaparradak denera iritsiko dira eta ekaitzak jo dezake.

Larunbatean hodeiekin eta euri apur batekin jarraituko dugu, baina prezipitazioak ez dira oso handiak izango eta orokorrean eguraldia hobea izango da. Zaparradak gehienak egunaren bigarren partean botako ditu eta batez ere barnealdean. Zeruan hodeiak izango dira, baita ostarteak ere; tenperatura freskoagoa izango da.

Igande lasaia, eguraldiaren aldetik behintzat. Zeruan hodei batzuk baina oskarbigube handiak ere bai. Tenperatura maximo epelak eta atseginak, minimoak aurreko egunetan baino freskoagoak. Egunaren bigarren partean euri arina egin lezake. Astelehenean euria izango da goitik behera eta hoztu egingo du, dezente. Maiatzaren 1etarako, asteartea, giro tristea izango da nagusi, euria ere gogotik egingo du. 

Ikusi edo bidali eguraldiari buruzko argazkiak EiTBra.