Herritarrei deia egin die Greenpeace erakunde ekologistak: "Lur planeta axola zaienek zera exijitu behar diete Gobernuei, gas isuriak murritz ditzatela". NBEk txosten apokaliptikoa kaleratu du klima aldaketaren inguruan.

"Denbora agortzen ari da klima aldaketaren ondorioak saihestu ahal izateko". Horrela, gogor, ohartarazi du Greenpeace erakunde ekologistak, NBEk gai horren inguruan txosten apokaliptikoa adostu eta gero.

Prentsa ohar batean dei zehatza egin die erakundeak herritarrei: "Amesgaizto hau gauza ez dadin, berotegi-efektua eragiten duten gas isuriak murrizteko exijitu behar diete Gobernuei Lur planetaren etorkizuna axola zaien guztiek".

"Etorkizuna beltza izan daiteke. Laster zer edo zer egiten ez badugu, Lurra eraldatu egingo da gizakiek eragindako klima aldaketaren erruz", gaineratu dute.

Raquel Monton Espainiako Greenpeaceko kidearen ustez, "oraindik ere alternatibak daude". Hori dela eta, "energia iraultza" egitearen alde agertu da, "sistema energetikoa erabat aldatu ahal izateko". "Iraultza hori egiteko, Gobernuek hitz egiteari utzi behar diote eta jardunean berehala jarri", esan du.

Erakunde ekologistak Espainia aztergai duen txostena aurkeztuko du apirilaren 11n, energia berriztagarrien inguruan.