Landabeneko industrialdera joateko errepidea 09:00etan itxi dute. Bost errepide daude itxita, bi sare nagusian. Arga ibaiak gainezka egin du 08:00etan.

 

Azken orduetan botatako urak uholdeak eragin dituzte Iruñan eta inguruko errepideetan. 09:00etan Landabeneko industrialdera joateko errepidea itxi dute, eta beste lau errepide ere egoera berean daude.

Arga ibaiak gainezka egin du Magdalena inguruan, 08:00etan, izen bereko zubiaren eta igerilekuaren paretik igarotzen den lekuan, Udaltzaingoak jakinarazi duenez. Datozen orduetan, egoerak okerrera egin dezakeela eta, ibai inguruan dauden autoak erretiratzen hasi dira.

Burlatarako errepide zaharra itxita dago zirkulazioarentzat eta Errotxapea zubiaren inguruan dauden ibilgailuak kentzen ari dira. Reyno de Navarra zelai inguruan, Sadar ibaia ere gainezka egitear dago, eta Elortz ibaia (Arostegi etorbidea) ere urez beteta dator.

Informazio hau idazteko unean (10:00ak), ondoko errepideak itxita zeuden:

1)N-113 (Iruña-Madril), Castejonen. Ebro ibaiak gainezka egin du eta joan den astetik urak hartuta dago errepidea.

2) NA-124 (Caparroso-Zarrakaztelu), 2. kilometroan.

3) NA-5330 (Pitillas-Santakara-Melida), 4 eta 6 kilometroen artean.

4) NA-140 (Izaba-Otsagabia) bi noranzkoetan itxita, Uztarrozetik bi kilometrora izan diren luizien ondorioz.