Dirudienez, azken egunetako euriteek luiziak eragin dituzte herri honetan eta eraikin hauetako bizilagunek "mugimenduak" nabaritu dituzte euren etxeetan.

Azkoitiko Aizkibel kaleko 1 eta 3 atalondoetan dauden 80 etxebizitzetako bizilagunek euren etxeak utzi behar izan dituzte goizean, bertan izandako lur-jausi baten ondorioz, eraikina "mugitu" delako.

Herriko aterpetxe batera eraman dituzte 80 familia hauek. Bien bitartean, mugimendu horiek eragin ditzaketen kalteak ikertzen ari dira, Herrizaingo sailak jakinarazi duenez.

Herri berean, luizien eraginez, Floreaga ikastetxeko frontoiko horma erori da.
11:30 inguruan eman diete bizilagun hauei euren etxeetatik ateratzeko agindua, eraikinetan "mugimenduak" egon direla salatu ostean.

Azkoitiko Udaleko eta Jaurlaritzako bi teknikari ezbeharra jazo den lekura hurbildu dira, kalteak baloratu eta honen inguruko erabaki bat hartzeko.