Iragarpenaren arabera, gaur eta bihar okerrera egingo du eguraldiak. Euria, kazkabarra, elurra eta haize bortitza espero dira datozen orduetarako ere.

 Negu giroarekin hasi dugu astea eta iragarpenek diotenaren arabera, atzotik Euskal Herria astintzen ari den denboraleak, euria, kazkabarra, elurra eta haize zakarra utziko ditu datozen orduetan ere.

Dagoeneko, aurreneko elur malutak ikusi dituzte hiriburu batzuetan, Iruñan eta Gasteizen, esaterako, EiTBko webcametan ikus daitekeenez.

 

Elur asko egin du eta arazoak sortu ditu, batez ere, Nafarroako errepideetan; kontu handiz gidatzeko gomendioa egin dute, izan ere, Iruña inguruko errepideak ere zurituta daude.

Apurka, baliteke Euskal Herriko txoko askotan irudi bera ikustea, izan ere, gero eta giro hotzagoa espero da, batez ere, egunaren azken aldera, itsasoaren parean ere elurra egin dezake eta.

EAEn, 100 eta 300 metro artean izango da elur-kota astearte honetan eta 10 zentimetroko lodiera izan dezake. Nafarroan, berriz, 50 zentimetroko lodierara hel daiteke, Espainiako Meteorologia Institutuak zabaldutako datuak aintzat hartuta.