WWF/Adenak "arazoari aurre egiteko ordua dela" jakinarazi die arduradun politikoei eta berandu izan orduko neurriak hartzeko eskatu die. Aldaketa klimatikoaren eta kutsaduraren ondorioz, munduko hamar ibai handi "hilzorian" daudela, aditzera eman du WWF/Adenak. Horrek, munduko ur eskasiaren mehatxua geroz eta larriagoa dela erakusten du.

Datorren martxoaren 22an Uraren Egunaren ospakizuna dela eta argitaratutako azken txostenean, "hiltzen ari diren" hamar ibai garrantzitsu horiek zeintzuk diren zehazten du WWF/Adenak.

Ibai horietatik bost Asian daude: Yangtze, Mekong, Salween, Ganges eta Indo; beste bat Europan dago, Danubio; bi AEBetan, La Plata ibaia eta Bravo; bat Afrikan, Nilo; eta azkena Australian, Murria-Darling.

Ildo horretan, ur-emariaren urritasunaren berri eman du erakunde ekologista honek.

Jamie Pittock WWF/Adena Ur Gezaren Munduko Programaren zuzendariaren arabera, "txostenean aztertutako ibaien egoerak argi uzten du ur gezaren krisia txantxetakoa ez dela". "Hainbat talde ekologistek azken urteetan egoera hori salatzen ari diren arren, inork ez die jaramonik egiten", azaltzen du Pittockek.

Salaketa honekin, berandu izan orduko, arduradun politikoek arazoari aurre egitea lortu nahi dute.